Sund kommune har fått ein bot på 500.000 kr. frå Klagenemda for offentlige anskaffelser (KOFA) for ikkje ha utlyst anbod på 2. byggjesteg av utvidinga av vegen til Telavåg. Første byggjesteg var mellom Spildepollen og Selstø. Overskotsmassar og andre tilhøve gjorde sitt til at vegen blei utvida vidare til Nipen som eit 2. byggjesteg. Kommunestyret vedtok at entreprenøren for 1. byggjesteg også skulle få resten av arbeidet då politikarane såg på det som ei vidareføring av jobben, og at dette dermed ikkje skulle ut på anbod. Det kanskje mest spesielle med denne saka er at det ikkje var andre entreprenørar som klaga på framgangsmåten til Sund kommune. Det var derimot Sund Framstegsparti som leverte inn klage då dei ikkje fekk gehør hos fleirtalet på at arbeidet  måtte ut på anbod. Dermed har politikarane i Sund direkte vore med og svekka kommuneøkonomien med ein halv mill. kr.  

Fylkesmannen har løyvd totalt 700 tusen kroner til ulike samarbeidsprosjekt i regi av Regionrådet vest. Pengane skal gå til utgreiing av kriminalitetsførebyggjande tiltak, samarbeid om barnevern, og fellesprosjekt knytt til byggje- og plansaker for kommunane Askøy, Fjell, Sund og Øygarden.  - Det er gledeleg at vi får desse pengane. Eg oppfattar det slik at Fylkesmannen med desse løyvingane ser at tiltaka er viktige og at dei er i samsvar med nasjonale satsingsområde, seier rådmann i Øygarden, Torgeir Sæter. Han er koordinator for prosjekta.

Helse og omsorgsdepartementet har løyvd eín million kroner til samhandlingsprosjektet Betre Saman og 250 tusen kroner til JordmorHeim-prosjektet i Fjell. Helse- og omsorgsminister Anne-Grete Strøm-Erichsen kunngjorde dette i samband med eit besøk i Fjell.

Betre Saman er eit samarbeid mellom Helse Bergen og kommunane Askøy, Fjell, Sund og Øygarden. Midlane skal gå til eit pilotprosjekt der målet er å etablera eit lokalmedisinsk senter på Straume i Fjell.  - Dette går rett inn i kjernen av samhandlingsreforma. Pasientane vil oppta mindre sjukehuskapasitet gjennom at dei ligg kortare tid på sjukehus, samstundes som dei får eit betre tilrettelagt tilbod for å meistra kvardagen, seier helse- og omsorgsministeren.  

JordmorHeim-prosjektet er eit samarbeid mellom Kvinneklinikken på Haukeland universitetssjukehus og Fjell kommune. Gjennom dette samarbeidet vil den nye familien sleppa å reisa tilbake til sjukehuset for barselpoliklinikk og prøvetaking.

Fylkestinget vedtok onsdag at ein trasé frå Bergen via Loddefjord til Straume på Sotra må vera blant korridorane for det framtidige bybanenettet, skriv Bergens Tidende. Planleggjarane meiner det ikkje er trafikkgrunnlag for å føra bybana til Sotra, men fylkespolitikarane er ikkje samde i dette. – Bybane er  framtida. Når vi planlegg nytt Sotrasamband, må vi også syta for at bybane er innarbeidd i desse planane, seier Pål Kårbø (KrF). Det var kun Høgre som ikkje støtta framlegget.

Rådmannen i Fjell går inn for at det vert gjennomført ei ekstern miljøteknisk undersøking i hamnebassenget i Knarrvik. I ei sak til komité for finans og forvaltning (KFF) vert det føreslått å kontrollera oppsamlingstankar med tilhøyrande røyrsystem og eventuelt sediment. Det vert også bede om aktuelle tiltak som bør setjast i verk mot forureining. Det er registrert fleire tilfelle av oljeforureining i hamnebassenget i Knarrvik. Det største utsleppet i den seinare tida vart registrert i september i fjor. Då vart det meldt om oljefilm på sjøen så langt nord som ved Hauglandsosen ved Askøy. Det synte seg at oljefilmen kom etter utslepp av spillolje. Saka skal drøftast i KFF tysdag åttande juni.

Den strenge vinteren i vest har slite hardt på vegane i Øygarden. No legg rådmannen fram ei liste med totalt elleve vegar som bør reasfalterast. Deler av vegen til Dalsneset, vegstrekningane Sjåneset – Dale, Toftedalen – Dalekletten, og vegen til bustadfeltet i Torsvik er blant vegstrekningane han meiner må rustast opp. Stabbemurane på Hellesøy og i Breivik har også fått omfattande skadar i løpet av vinteren, og rådmannen meiner desse bør reparerast av omsyn til trafikktryggleiken. Saka vart lagt fram for drøfting i komité for teknikk i dag.

Drifta av Fjell Festning gjekk i 2009 med eit underskot på 270.000 kroner. Det er Museum Vest som står for drifta av anlegget. Stiftinga Fjell festning si oppgåve er å vedlikahalda, opprusta og utvikla festningsanlegget. Museum Vest har skissert fire moglege løysingar for å få ei forsvarleg økonomisk drift. Det er føreslått at Museum Vest får tilbakebetalt driftsunderskotet  i 2009 fordelt på to avdrag i 2010 og 2011. I tillegg er det aktuelt å auka det årlege tilskotet frå Fjell kommune som i 2010 er på 800.000 kroner. Saka skal drøftast i komité for drift tysdag 8. Juni, og rådmannen i Fjell legg saka fram utan innstilling. Ordørar Lars Lie seier til Radio Sotra at han er uroa over den økonomiske utviklinga ved festninga, og utelukkar ikkje at stiftinga kan bli oppløyst som ei følgje av dette.

Rundt 3.000 menneske fann vegen til sommarfesten i Straume Idrettspark laurdag kveld. Dette er 500 færre enn i fjor, men Rolf Øvretveit i selskapet ”Heilt Konge” er likevel nøgd med oppmøtet. – Hadde vi ikkje vore så heldige med vêret, kunne vi fort gått på ein økonomisk smell. Slik det ser ut no, reknar eg med at vi kjem ut i balanse, seier Øvretveit til Sotranett.